Սոցիալ-հոգեբանական աջակցության ընդհանուր բնութագիրը
«Կարմիր խաչի և Կարմիր մահիկի միջազգային շարժման մեջ հոգեբանական աջակցության գաղափարը ծագել է նրանում դրված հիմնարար սկզբունքներից։ Մասնավորապես, հիմնարար սկզբունքներից մարդասիրությունը հենվում է ցանկացած պարագայում մարդկային կարիքը մեղմելու գաղափարի վրա, որին էլ անմիջականորեն միտված է մարդասիրական օգնության հոգեբանական բաղադրիչը։
Սոցիալ-հոգեբանական աջակցությունը վերաբերում է գործունեության այն տեսակներին, որոնք ուղղված են անհատների, ընտանիքների և համայնքների ինչպես հոգեբանական, այնպես էլ սոցիալական կարիքների բավարարմանը։ Այդ գործողությունները նպաստում են անհատների, համայնքների ներուժի օգտագործմանը, արդյունքում՝ դիմակայունության ամրապնդմանը, մարդկային հիմնախնդիրների մեղմացմանը։
Սոցիալ-հոգեբանական աջակցության գործողություններն ուղղորդվում են հետևյալ սկզբունքներով․
- անհատների, համայնքների ուժեղ կողմերի և դիմակայունության կարևորում,
- վաղ միջամտություն և շարունակական աջակցություն,
- մշակութային առանձնահատկությունների կարևորում,
- տուժած անձանց, շահառուների ակտիվ մասնակցության խթանում,
- բոլոր էթնիկական և սոցիալական խմբերի ներառում,
- կայունության և կարողություների զարգացման վրա կենտրոնացում։
Հոգեբանական աջակցությունը կարող է լինել սոցիալական կամ բժշկական ծրագրերի բաղկացուցիչ մաս կամ հանդես գալ որպես ինքնուրույն բաղադրիչ։ Սոցիալական կամ բժշկական խնամքի տրամադրման ծրագրերի համատեքստում հոգեբանությունն օգնում է արձագանքման, օգնության ցուցաբերման առավել ճիշտ մոտեցումների և ուղիների ընտրման հարցում, ինչը նպաստում է մարդկային արժանապատվության պահպանմանը, օգնության կարիք ունեցող անձանց ինքնավստահության և անվտանգության զգացումների ամրապնդմանը։»
Նյութը պատրաստվել է Հայկական Կարմիր խաչի ընկերության «Արտակարգ իրավիճակներին բարելավված նախապատրաստում և համակարգված արձագանքում Հարավային Կովկասում» ծրագրի շրջանակներում։
Շարունակելի
Շարունակելի
